Pixel 8 Pro 及其他 Pixel 手機系列更新後隱藏新功能 [多圖教學]

Pixel 8 Pro推出時承諾有 7年嘅軟件更新，真係一部機用10年不是夢！咁用咁多年都少不免要維修下，拎出去整機有時又怕啲外人睇到自己嘅資料無曬私隱，呢個功能就實幫到你啦！

Google Pixel 喺12月嘅Android 14更新入面推出咗一個新功能 – 「維修模式」，目的係為咗保護用戶喺維修期間嘅私隱。當你將手機送去維修嗰陣，維修模式可以確保你嘅個人資料唔會被第三方維修人員接觸到。呢個功能對於注重私隱嘅用戶嚟講，絕對係一個好消息！

開啟「維修模式」教學：

先到「設定」拉到最底撳「系統」

「系統」拉到最底撳「維修模式」

撳左下角「進入維修模式」後輸入密碼即可

維修模式啟動之後，所有個人應用程式同數據將會被隱藏，維修人員只能夠訪問到系統自帶嘅應用程式，從而進行必要嘅檢查同維修工作。等到手機返到用戶手上，退出維修模式之後，所有嘅資料就會再次顯示，而且唔需要重新登入。

Google 嘅呢個創新做法，將會為手機維修行業帶嚟一個新嘅標準。用戶唔再需要擔心自己嘅照片、訊息或者其他敏感資訊喺維修期間被人窺探。雖然目前呢個功能只喺Pixel手機上提供，但係相信未來會有更多嘅手機製造商跟隨Google嘅腳步，推出類似嘅用戶保護措施。

以下Pixel手機將支援「維修模式」：

Pixel 8 and Pixel 8 Pro

Pixel Fold

Pixel 7, Pixel 7 Pro, and Pixel 7a

Pixel 6 Pro, Pixel 6, and Pixel 6a

Pixel 5a (5G)