Samsung 就喺 Galaxy Unpacked 發佈會正式推出咗全新嘅智能健康戒指——Samsung Galaxy Ring。呢隻戒指無論係外觀設計、功能、續航力定係手機配對方面，都展示咗 Samsung 喺智能穿戴設備領域嘅最新科技，等我哋一齊嚟睇下呢隻備受矚目嘅智能戒指。

外觀設計

Samsung Galaxy Ring 嘅設計老實講幾靚仔同埋好輕巧。戒指係用鈦金屬製成，有三款顏色畀你揀：鈦黑、鈦銀同埋鈦金。佢有九個size比大家揀，最重嘅size都只不過係 3g，輕盈嘅設計加上10ATM 和 IP68 嘅防水性能令佢適合全天佩戴，無論係日常活動定係運動健身，都可以輕鬆應付。

強大Sensors

Galaxy Ring內置咗三個先進嘅傳感器，包括加速感應器、光學心跳感應器以及皮膚溫度感應器。呢啲傳感器可以精準追蹤用家嘅健康狀況，例如心率監測、睡眠追蹤、月經週期和運動數據等等。值得一提嘅係 Galaxy Ring 配備咗 Samsung 嘅 Galaxy AI，可以根據用家嘅身體數據去生成唔同嘅健康報告或者建議，幫助用家更好咁了解自己嘅身體狀況。

睇更多科技新聞文章

無縫手機配對

Samsung Galaxy Ring 可以同 Samsung Galaxy 手機無縫配對，帶嚟更多方便嘅功能。通過 Samsung Health 應用，所有健康數據都會同步到手機，令用家隨時隨地睇到自己嘅健康狀況。另外，Galaxy Ring 仲支援輕點手指嚟控制手機，例如影相或者停止鬧鐘，都幾實用（Samsung Galaxy電話先得）。但留意呢隻戒指就只係連到 Android 電話，而 Health AI 同 Find My Ring 嘅功能就淨係 support Galaxy 電話。

續航力強勁

有睡眠健康監測嘅 Smart Watch 成日都比人質疑佢哋嘅電池續航力，因為瞓教差唔到電㗎嘛！同埋成日臨出門口先發覺隻錶無差電，所以續航力都係呢啲產品嘅重點之一。而 Galaxy Ring 嘅電池續航力就勁啦，單次充電可以持續用六日，同埋佢仲有配埋個專屬嘅 361mAh 透明充電盒（約可充電20次），咁用家只需要每一個禮拜充電一次就可以輕鬆睇到自己瞓得好唔好啦～

幾錢？

Samsung Galaxy Ring 賣 US$399（約HK$3115），將會在 7 月 24 號正式推出，不過佢並無出現喺日前 Samsung 準備俾香港媒體嘅產品體驗活動上，所以香港地區同時間推出嘅機會都唔太大，有興趣嘅fans可能仲要稍等多一陣！

美國地區 Samsung 官網介紹